फक्राबाद रोडवर वाळू माफियाचा खरा चेहरा उघड! जामखेड तालुक्यात वाळू माफियाविरुद्ध स्थानिक गुन्हे शाखेची धडकेबाज कारवाई

जामखेड प्रतिनिधी/30नोव्हेंबर2025

जामखेड तालुक्यातील फक्राबाद शिवारात अवैध वाळू वाहतुकीवर स्थानिक गुन्हे शाखेने सापळा रचून कारवाई केली असून, आरोपीकडून ५ लाख १० हजार रुपयांचा मुद्देमाल जप्त करण्यात आला. ही कारवाई ३० नोव्हेंबर २०२५ रोजी पहाटे पार पडली.

अहिल्यानगरचे पोलीस अधीक्षक सोमनाथ घार्गे यांनी जिल्ह्यात अवैध गौणखनिज उत्खनन आणि वाहतुक रोखण्याबाबत स्थानिक गुन्हे शाखेला स्पष्ट सूचना दिल्या होत्या. स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली पोउपनि समीर अभंग यांच्या नेतृत्वाखालील पथकाला हा छानंदोरा सोपवण्यात आला. पथकात हृदय घोडके, लक्ष्मण खोकले, शामसुंदर जाधव, भिमराज खर्से आणि भाऊसाहेब काळे यांचा समावेश होता.

जामखेड पोलीस ठाणे हद्दीत आरणगांव-हाळगांव रोडने ट्रॅक्टर ट्रॉलीत वाळू भरून फक्राबादकडे जाणाऱ्या वाहनाची माहिती मिळाल्यानंतर पथकाने हॉटेल मामाश्री जवळ सापळा रचला. ट्रॅक्टर थांबवून तपास केल्यावर त्यात वाळू भरलेली आढळली. चालक रविंद्र उर्फ राम बाबासाहेब उबाळे (वय २६, रा. चौंडी, जामखेड) याने स्वतःचा माल असल्याचे सांगितले, परंतु परवाना किंवा रॉयल्टी पावती नव्हती.

आरोपीकडून १०,००० रुपयांची १ ब्रास वाळू आणि ५ लाख रुपयांची ट्रॅक्टर ट्रॉली जप्त करण्यात आली. जामखेड पोलीस ठाण्यात भारतीय न्याय संहिता २०२३ च्या कलम ३०३(२) अंतर्गत गुन्हा क्रमांक ६३६/२०२५ दाखल करण्यात आला असून, पोना शामसुंदर अंकुश जाधव यांच्या फिर्यादीवरून पुढील तपास सुरू आहे. ही कारवाई जामखेड तालुक्यातील सतत होणाऱ्या वाळू माफिया कारवायांच्या पाश्र्वभूमीवर महत्त्वाची ठरते.