दीक्षाभूमीवर सभापती प्रा. राम शिंदे यांची वंदनयात्रा; बुद्ध-आंबेडकरी विचारांतून सामाजिक क्रांतीचा संकल्प

नागपूर प्रतिनिधी/८ डिसेंबर२०२५

नागपूर येथील ऐतिहासिक दीक्षाभूमीला भेट देत सभापती प्रा. राम शिंदे यांनी डॉ. बाबासाहेब आंबेडकरांना अभिवादन करून सामाजिक न्याय, संविधान मूल्ये आणि बौद्ध धम्माच्या मार्गावर चालण्याचा निर्धार व्यक्त केला. दीक्षाभूमी येथे बुद्धमूर्तीला पुष्पांजली अर्पण करून प्रा. राम शिंदे यांनी डॉ. आंबेडकरांच्या कार्याला विनम्र अभिवादन केले.यावेळी उपस्थित कार्यकर्त्यांसोबत त्यांनी समताप्रधान भारत घडवण्यासाठी संविधानिक आणि लोकशाही मार्गाने लढा सुरू ठेवण्याचे आवाहन केले. राम शिंदे यांनी या भेटीद्वारे जातनिरपेक्ष, भेदभावमुक्त समाजनिर्मितीसाठी युवकांनी बौद्ध धम्मातील करुणा, प्रज्ञा आणि मैत्रीची तत्त्वे आचरणात आणावी असे सांगितले.शिक्षण, संघटन आणि संघर्ष या डॉ. आंबेडकरांनी दिलेल्या मूलमंत्रांवर चालतच वंचित, शोषित घटकांच्या हक्कांसाठी संघर्ष सुरू राहणार असल्याचे त्यांनी स्पष्ट केले.

कार्यक्रमास स्थानिक पदाधिकारी, कार्यकर्ते तसेच विविध सामाजिक संघटनांचे प्रतिनिधी उपस्थित होते आणि त्यांनीही डॉ. आंबेडकरांच्या स्मृतीप्रीत्यर्थ आदरांजली वाहिली.दीक्षाभूमी परिसरात या निमित्ताने अनुयायांची मोठी गर्दी उसळली असून जागोजागी बौद्ध ध्वज आणि जयभीमच्या घोषणांनी परिसर दुमदुमून गेला.