मोकळा रस्ता नाही; जवळा-चोभेवाडी रस्ता अतिवृष्टीने वाहतुकीसाठी पूर्ण ठप्प, नागरिकांची आपत्कालीन सेवा अडचणीत; प्रशासन निवडणुकीमध्ये व्यस्त, दुरुस्तीची नागरिकांची तातडीची मागणी

जामखेड प्रतिनिधी/6 नोव्हेंबर2025

जामखेड तालुक्यातील जवळा-चोभेवाडी रस्त्याच्या नदीकाठील भाग अतिवृष्टीने वाहून गेल्याने या भागातील ९०-१०० कुटुंबे, शेतकरी, दूध आणि उस उत्पादक दैनंदिन वाहतुकीसाठी वापरात येणाऱ्या या महत्त्वाच्या रस्त्याचा वापर ठप्प झाला आहे. या रस्त्याच्या बंदिस्त अवस्थेमुळे आपत्कालीन परिस्थितीत नागरिकांना रुग्णालयात पोहचण्यास, तसेच मुलांना शाळेत जाण्यास मोठा अडथळा उभा राहिला आहे.

महाराष्ट्र राज्यात जून ते सप्टेंबर २०२५ या काळात झालेल्या अतिवृष्टीमुळे खूप मोठ्या प्रमाणात शेती आणि इतर जीवनावश्यक क्षेत्रांना नुकसान झाले आहे. जामखेड तालुक्यासह इतर अनेक तालुक्यांना सरकारने अतिवृष्टी नुकसानभरपाई यादीत समाविष्ट केले असून, हा भाग अतिवृष्टी नुकसानभरपाई पात्र आहे.

जवळा भागातील या रस्त्यावरील दुरावस्थेवर राज्य आणि स्थानिक प्रशासनाने त्वरित लक्ष देणे गरजेचे आहे. मात्र, सध्या आगामी जिल्हा परिषद आणि पंचायत समितीच्या निवडणुकीच्या तयारीमध्ये असलेल्या राजकीय पक्षांच्या कार्यकर्त्यांनी सामान्य नागरिकांच्या मूलभूत सुविधांकडे दुर्लक्ष केले आहे का अशी चर्चा जवळा येथील नागरिकामध्ये सुरू आहे.

रस्ता नसल्याने नागरिकांच्या हालचालींना मोठी अडचण येत आहे.रस्त्याच्या दुरावस्थेची तपासणी, त्वरित दुरुस्ती करणे आणि यासाठी निधी मंजूर करून हा रस्ता पुन्हा जलद सुरू करणे आवश्यक बनले आहे. प्रशासनाने या भागातील नागरिकांच्या समस्यांकडे प्राधान्याने लक्ष देत मूलभूत सुविधांची पूर्तता करावी, ज्यामुळे नागरिकांना आपत्कालीन सेवा आणि दैनंदिन कामकाजात अडचण येऊ नये.एकंदरीत, जामखेड तालुक्यातील अतिवृष्टीमुळे झालेल्या मोठ्या आर्थिक-जीवनमानावर होणाऱ्या परिणामांना दूर करण्यासाठी शासनाने योजनेतर्गत मदत राबवावी, शेतकऱ्यांनी नुकसानभरपाई घ्यावी आणि प्रशासनाने नागरिकांच्या मूलभूत गरजा त्वरित पूर्ण कराव्यात, अशी अपेक्षा नागरिकांमधून व्यक्त केली जात आहे. या प्रक्रियेत स्थानिक निवडणुकांच्या गदारोळापेक्षा नागरिकांच्या जीवनाला महत्त्व देणे आवश्यक आहे.